SPORT

Visie:
Die doel van netbal is om ‘n liefde vir die sport en ‘n gebalanseerde lewenswyse by die dogters te kweek, asook om die nodige netbalvaardighede aan te leer. Netbal is ‘n kompeterende sport en so leer die dogters om na die beste van hul vermoë te presteer. Netbal word op weervaste bane gespeel. Laerskool Witrivier beskik oor 8 bane. Die netbalseisoen begin aan die einde van die eerste kwartaal en eindig in Junie van elke jaar.

Spanne:

Die O/7, O/8, O/9’s en O/10’s speel mini-netbal. Daar word nie telling gehou nie en massa deelname word aangemoedig. Ons poog om soveel moontlik dogtertjies te laat deelneem en die vaardighede word informeel aangeleer. Daar vind jaarliks ten minste 2 mini-netbal feesdae waaraan ons deelneem.

Die O/11’s speel kompeterende netbal, maar nie liga nie.  Die O/12 en O/13’s speel kompeterende netbal en word elke jaar geafillieer by Suid-Afrikaanse Skole Netbal (SASN).

Individuele proewe:

Die 0/12 en 0/13 dogters kan kwalifiseer om proewe te speel vir die Mpumalanga Skole Netbal (MSN) provinsiale span wat jaarliks in die Junie-skoolvakansie deelneem aan die Nasionale netbal toernooi. Laerskool Witrivier streef na uitnemendheid en word op ‘n gereelde basis genader om die Mpumalanga Kampioenskappe aan te bied in samewerking met MSN.

Die mini-krieket vind plaas in die derde kwartaal. Alle Gr 1 & Gr 2 seuns en dogters is welkom. Ons streef daarna om elke speler ‘n wedstrydkans te gee. Ons poog om ten minste aan twee Feesdae deel te neem.

Spanne
Alle leerders, seuns en dogters, van ouderdom 0/7 tot 0/13 is welkom.
0/6 – 0/8 Sub Nippers
0/09 – 0/10 Nippers
0/11 – 0/12 Sprog
0/13 – 0/14 Sub Junior

Spur “School Mountain Bike League” se ouderdoms groepe.

Afrigter
Juffrou Elana en Tannie Soretha

Byeenkomste

Die skool neem deel aan die “School Mountain Bike League” wat deur Spur aangebied word. Die skool gee erkenning aan die kinders wat in die reeks byeenkomste deelneem. Die leerders kan ook op hul eie aan ander fietsry geleenthede deelneem.

Kleredrag

Die leerders kan in ‘n gemaklike hemp met tekkies, fietsry-broek en helmet oefen. Elke leerder moet hul eie fiets en valhelm hê. Tydens ‘n resies moet die leerders met die skool se fietsry-broek of step-out hemp ry.

Skole-landloop is ‘n baie gewilde sportsoort by Laerskool Witrivier. Enige leerder is welkom om deel te neem aan landloop, dit bied ons leerders die geleentheid om uithouvermoë en deursettingsvermoë te beoefen. Dit is net die regte oefening om lekker fiks te word wat ‘n voordeel inhou vir alle sportsoorte. Ons doel is om ‘n liefde te kweek vir hardloop en om leerders se selfdissipline en doelgerigtheid te verbeter.

Die skole-landloop vind tydens die tweede en derde kwartaal van die jaar plaas en daar is geen beperking op deelnemers nie. Leerders kan reeds vanaf graad 1 deelneem. Selfs ouers voeg hul energie en passie vir landloop by en kom oefen saam. Ons het soms selfs voorskoolse atleetjies wat hul staal kom wys. Ons neem elke jaar graag deel aan verskeie landloopbyeenkomste en kampioenskappe wat twee bene het:

Gedurende die tweede kwartaal registreer ons atlete om aan die ASA kompetisies in die omgewing deel te neem en in die derde kwartaal neem ons deel aan die skole landloop. Tydens hierdie kompetisies het ons jaarliks heelwat atlete wat tot op nasionale vlak vorder en het al in die verlede al ‘n hele paar eerste plekke op hierdie vlak behaal. Toegewyde oefening en goeie sportmanskap kenmerk ons skool se sukses in landloop. Kontak gerus die skool.

1. Skaak-unie maak jou kind slimmer
Talle wetenskaplike studies het al bewys dat skaak ʼn kind se intelligensie ontwikkel. Dit is eintlik logies want skaak help kinders om hul analitiese vaardigheid te ontwikkel en leer hulle hoe om probleme op te los. Die beste hiervan is dat jou kind hierdie vaardighede ook in ander aspekte van sy of haar lewe kan gebruik.

2. Dit verbeter sosiale vaardighede
Skaak leer kinders sosiale vaardighede en verbeter dit. Dit gaan hier oor meer as net verbale kommunikasie. Skaak leer jou kind hoe om elke wen en verloor te hanteer. Jou kind leer hoe om geduldig te wag terwyl sy teenstander sy opsies oorweeg.

3. Dit is ʼn uitstekende aktiwiteit vir skoolvakansies
Skaak kan ʼn groot bydrae daartoe maak dat jou kind se vakansies meer betekenisvol kan wees. Fisiese oefening is natuurlik ook belangrik maar jou kind moet ook nie die geleentheid misloop om sy verstand verder te ontwikkel nie.

4. Dit verbeter konsentrasie
Deur skaak te speel, ontwikkel kinders die vermoë om te konsentreer. Kinders vind dit moeilik om lank op ʼn taak te konsentreer en dit is waarom ouers hulle kinders moet help om hierdie vaardigheid te ontwikkel.

5. Dit verbeter taalvaardighede
Dit klink dalk onlogies dat skaak jou taalvaardighede ontwikkel, maar talle wetenskaplike studies het al bewys dat skaak ʼn indirekte uitwerking op ʼn kind se taalvaardighede het. Skaak stimuleer verskillende areas in ʼn kind se brein en het dus ook ʼn impak op sy logika, wat ’n belangrike aspek van taalvaardigheid is.

6. Skaak verbeter logiese denke
Skaak leer ʼn kind om strategies te dink. Hy leer hoe om te beplan en hoe om sy plan by elke nuwe situasie aan te pas. Ons weet dat goeie skaakspelers al geleer het hoe om drie of vier stappe vooruit te dink.

7.  Skaak verbeter verskeie lewensvaardighede
Dit is belangrik om uit te lig dat jou kind belangrike lewensvaardighede kan aanleer deur skaak te speel. Byvoorbeeld, ʼn kind kan intuïtief aanleer hoe om op sy teenstander se lyftaal te let en dit te interpreteer. Hy leer ook vinnig hoe om sy eie impulsiewe gedrag te beheer want hy sien in dat vinnige besluite tot foute kan lei. Skaak leer jou ook omtrent die belangrikheid van spanwerk en dat dit soms nodig is om iets op te offer voordat jy iets beter kan verkry.

Skaak is ‘n baie populêre sport by ons skool.  Jaarliks presteer baie van ons leerders tot op nasionale vlak. Ons neem op twee vlakke deel:

Skoleliga:  In hierdie toernooie speel die plaaslike skole teen mekaar en geskied in spanverband. Dit vind normaalweg in die tweede en derde kwartaal plaas.
Ope-toernooie: Ope-toernooie word regdeur die jaar gespeel van Januarie tot Desember. Individueel:  Enig persoon wat skaak kan speel mag deelneem. Jaarlike registrasie fooie is betaalbaar by die skaakunie om te registreer vir die jaar. Spelers word in kategorie ingedeel volgens graderings, ouderdomme of ervaring. Spelers kan reeds van graad een af deel neem. Ervare en goeie spelers kan soms teen volwasse spelers te staan kom en hulle selfs die loef af steek.

Ons deel skaak by ons skool in 3 groepe, nl. juniorskaak vir graad 1 tot 3, skaak vir beginners gr 4 tot 7 en gevorderde skaak vir spelers gr 1 tot 7. Ons spelers neem skaak baie ernstig op. Sommige neem privaat ekstra lesse bo en behalwe die oefengeleenthede by die skool.

Oefentye:  2 ure per week soos die program toelaat.

Tydens die prysuitdeling aan die einde van die jaar word 2 toekennings gemaak vir:  Senior speler van die jaar en Junior speler van die jaar.

Kontak die skool gerus om u kind te laat inskakel!

Doelstellings:

• Om leerders die kans te bied om te leer hoe om sokker te speel en te geniet.
• Om die spelers bloot te stel aan kwaliteit sokkerafrigters.
• Om sokker in Laerskool Witrivier te ontwikkel.

Sokker het een afrigter per ouderdomsgroep. Die afrigter het ‘n assistent om hom/haar te help en die span na wedstryde te vergesel. Proewe vind aan die begin van kwartaal 4 plaas. ‘n Groep sal gekies word waaruit die spanne bestaan. Dit is ‘n vereiste dat die voornemende spelers gedurende die jaar twee ander sportkodes moet nakom voordat hulle vir sokker kwalifiseer. Daar is twee gekombineerde spanne – wat bestaan uit O/10 en O/11 spelers en O/12 en O/13 spelers vir seuns.  Die skool het een O/13 dogterspan wat bestaan uit O/12 en O/13 spelers. Die liga is ‘n vriendskaplike liga wat gedurende die vierde kwartaal plaasvind.

Kleredrag:

Wedstryde – Step out uniform, met wit hokkiesokkies, beenskerms en sokkerstewels.
Oefeninge – Spelers moet gemaklike oefenklere dra, met skeenblokkies en  sokkerstewels.